機械鍵盤？Sure！But Why？
電子嘢有新買新呢啲咁簡單嘅道理，天知地知，眾所…知。但你又知唔知原來今時今日大行其道嘅機械鍵盤，其實係曾經被淘汰嘅技術；大家都覺得唔入流嘅Cheap Cheap薄膜鍵盤反而先係新晉科技！？
由上世紀80年代IBM推出第一部PC開始，配備嘅鍵盤就已經係機械鍵盤，而去到1984年，一款對後世鍵盤影響深遠嘅產品 - IBM Model M面世，可以話係為現代鍵盤嘅定形嘅里程碑，而呢款超級經典嘅鍵盤到而家都仍然喺二手市場灸手可熱，亦都有好多發燒友曾經嘗試復刻。
喺嗰個年代，個人電腦同Server使用嘅都係機械鍵盤，亦都推出過好多千奇百怪但喺今時今日都係千金難求嘅經典產品，可以話係機械鍵盤Fans嘅天堂，反而薄膜鍵盤先係後來推出嘅新科技。對於用家嚟講，薄膜鍵盤作為更新穎嘅產品，防水、防塵表現都好過機械鍵盤，使用上更加寧靜，更不乏便攜嘅超輕薄產品，當然吸引過笨重嘅機械鍵盤。而喺廠商嘅角度，薄膜鍵盤可塑性高，無機械結構嘅局限，可以做到超細、超薄嘅體積，而且造價大幅低過機械鍵盤，令佢變成電腦廠商標配嘅新寵。喺機械鍵盤作為主流嘅早期，電腦並唔普及，所以用過嘅人唔算多，而薄膜鍵盤出現嘅時間咁啱係電腦開始普及嘅年代，廠商偏好薄膜鍵盤，加上絕大部份用家都未必會另外買鍵盤用，所以造就薄膜鍵盤佔據絕對市場份額嘅局面。
咁點解曾經一度被淘汰嘅機械鍵盤又出現返喺大眾嘅眼中，仲要主導高階鍵盤市場，一舉成為用家喺升級鍵盤嗰陣最優先亦都幾乎係唯一嘅選擇呢？今時今日，機械鍵盤亦都係遊戲玩家嘅首選，點解鍵盤又會同電子競技扯上關係呢？
咁就要由機械鍵盤嘅原理講起。
上圖係一個線性(類紅)機械軸嘅運行過程。
隨住軸柱被按壓，左邊嗰塊活動嘅「彈片」會慢慢向對面反彈，當軸柱被按壓到某一個位置，彈片會掂到金屬接點，兩者通電，從而觸發訊號，再而軸柱向上回彈，彈片就會被推開，訊號就會斷開。
大部份機械軸嘅觸發點都喺鍵程嘅一半左右，部份軸體會為遊戲表現將觸發點提高至1/3甚至更淺，令你撳落去會觸發得更快；或者縮短鍵程，令你更快撳到底，更快彈返起身。
而薄膜鍵盤就係用以一層矽膠做嘅膠膜作為鍵盤嘅觸發機關。膠膜上面每一個按鍵位置都有一個突起嘅膠碗，當用家撳個按鍵嗰陣，膠碗被撳到向下變形，去到鍵程最底嘅時候，喺膠碗入面嘅金屬接點同電路板上面兩個金屬接點組合密閉電路，從而通電觸發訊號。
睇完兩者嘅對比，相信讀者心中都大概有個答案啦。
而筆者以為，機械鍵盤復興嘅原因有三：
一) 遊戲表現
機械軸體嘅觸發點主要都喺鍵程嘅一半左右，以主流嘅Cherry軸為例：Cherry MX紅軸2mm(4mm鍵程)、茶軸2mm(4mm鍵程)、青軸2.2mm(4mm鍵程)、而標榜觸發速度嘅MX銀軸觸發點去到1.1mm(3.5mm鍵程)。
因為薄膜鍵盤設計嗰陣電腦遊戲尚未流行，相比起機械軸體，喺觸發速度上薄膜就遲鈍得多，基本上係要撳到最底先觸發。喺分秒必爭、連上網速度都要爭盡最後1個bit嘅電競玩家嚟講，機械鍵盤對遊戲表現更為有利。
即使而家市面上出現咗Razer Ornata或者Steelseries Apex 5嘅所謂「半機械式」(嚴謹嚟講係薄膜鍵盤)，用重新設計嘅推桿令觸發點提高到鍵程一半，但兩者嘅售價都高過唔少入門級嘅機械鍵盤，相信係因為獨家嘅重新設計開模等令成本上升，價錢上已經匹敵主流機械鍵盤，如果薄膜鍵盤失去咗價格上嘅優勢，就更加無條件同機械鍵盤比較。
二) 電競市場
機械鍵盤嘅復興同電子競技嘅興起不無關係。應該話今時今日絕大部份主流用家都係因為打機而認識機械鍵盤。大約係00年代中後，Razer、Steelseries等遊戲設備廠商睇準咗機械鍵盤喺遊戲上嘅優勢，開始推出自家嘅機械鍵盤，以提升競技表現作招徠，喺幾年嘅推廣之下，大部份有條件嘅遊戲玩家都以機械鍵盤作為標準裝備。當塊餅做大咗嘅時候，就自然會興起良性或惡性價格戰，大牌子機械鍵盤由以往動輒近千或過千，而家入門款已經去到4XX價位，而中國廠商將目標放咗喺中低價位，時至今日，中國品牌嘅Cherry軸嘅入門款3XX價位已經可以入手，而其他雜牌軸嘅產品更加低至1XX甚至雙位數字！機械鍵盤嘅價格更易入口，自然令更多人願意嘗試。
縱然好多DIY鍵盤用家唔太睇得起市面上嘅廠商自家軸體或者鍵盤，但唔好唔記得，DIY市場上有好大部份有口皆碑嘅軸體都係由凱華、Gateron、TTC等大型軸廠生產。而Razer、Steelseries等廠商喺Cherry主導市場嘅時期率先向Cherry以外嘅軸廠，例如凱華、Gateron等訂製軸體，有助呢批非Cherry廠商發展出自己嘅路線。而呢批軸廠某程度上發家都有受益於遊戲廠商嘅大訂單，得以發展。所以筆者認為機械鍵盤復興某程度上嘅最大功臣係呢班遊戲廠商同玩家。
三) 收入提升 + 對生活質素嘅追求
相比起手感單一嘅薄膜鍵盤，機械鍵盤軸體喺手感同特性都提供更多選擇。例如Cherry青軸嘅爽脆、茶軸嘅反饋、紅軸嘅輕軟。撇除Cherry青、紅、茶，黑呢四大金剛，凱華、TTC、Gateron等都推出過好多各方面都超越Cherry軸嘅產品，發展至今數得出名號嘅軸體產品已經數以百計，唔同按壓力度嘅分支、別樹一格嘅設計、增強防水防塵性能嘅結構、甚至有為咗登峰造極而取各家所長，用唔同軸體唔同部份嚟縫合出新嘅品種。雖然呢啲主要流通於入門門檻更高嘅DIY市場，但總會有對手感有更高要求嘅玩家 / 發燒友去追捧。
香港人喺收入越來越高嘅同時，亦都開始提升對生活質素嘅追求，喺五位數字都係聽個響字嘅音響/耳機市場狂熱可見一斑。DIY鍵盤市場嘅狂熱並唔低得過音響，動輒千幾蚊一套鍵帽、幾千蚊一個套件(外殼+電路板)，喺二手市場甚至炒賣數千蚊一套鍵帽、過萬一隻鍵盤都唔係啲咩新鮮事。
而無論你係每日工作需要長時間使用電腦嘅社畜、每日打2次機1次打12個鐘嘅骨灰級玩家，或者係每日上各大科林談笑間檣櫓灰飛煙滅嘅鍵盤戰士，一千幾百買一個高質嘅鍵盤並唔係一件難以接受嘅事，畢竟可能你每日摸個鍵盤嘅時間可能仲多過部過萬嘅iPhone。
作為隨筆，今日先寫到嚟呢度，希望有機會下回再分享多少少鍵盤嘅資訊。:)