機械鍵盤購買攻略 - 軸體篇
相信絕大部份用家喺選購新嘅機械鍵盤嗰陣，最難決定嘅其中一個因素就係軸體啦，Cherry四大金剛青、紅、茶、黑都已經好多人分唔到，加埋軸廠+電競廠商加入戰團之後更加花多眼亂，Razer又綠黃橙紫紅、HyperX又火水冰軸、Logitech又GX青紅茶軸，啲顏色真係仲多過女神嘔出嚟嘅彩虹呀……
軸呢家野，從來都無最好，只有最啱，究竟點先搵到一隻啱你用嘅軸呢？咁就要先由源頭開始了解。
機械軸主要係分為3.5種特性，分別係直上直落嘅Linear線性軸(例如Cherry紅、黑軸)、有觸感反饋嘅Tactile段落軸(例如Cherry茶軸)同埋爽脆嘅Clicky有聲段落軸(例如Cherry青軸)，剩低嗰0.5就係Linear同Tactile對應嘅靜音版本。
首先講吓大部份初次接觸機械鍵盤嘅用家都會比較感興趣嘅Clicky軸先啦。
Clicky軸之中最出名同普及嘅莫過於Cherry MX青軸，因為MX軸係源於Cherry呢間德國公司，喺2014年專利結束之前已經有好多年奠定嘅基礎，有住稱霸都不為過嘅高市佔率。呢類嘅軸體結構主要係喺段落軸嘅基礎上增加一啲機關，令到按壓嘅時候金屬片會大力反彈，做出清脆嘅響聲同手感。以Cherry MX青軸為例，就係增加咗一個滑塊，令到按壓到某一個位置嗰陣，彈片大力彈向金屬接點嚟做出呢種效果。
雖然Cherry青軸可謂最為人熟知嘅Clicky軸，但喺而家呢個百花齊放嘅年代嚟講只可以話係中庸之選。先唔講機械軸體中幾乎公認係最強Clicky軸嘅凱華Box White/ Jade/ Navy，即使係現成鍵盤嘅選擇入面，由TTC代工嘅Razer綠軸好明顯優於Cherry青軸，Cherry青軸嘅手感只係同Gateron、凱華等廠嘅入門Clicky軸持平，唯二優勝嘅地方可能就係造工同穩定性(軸心、軸蓋)。
而頭先提到嘅凱華Box White/Jade/Navy，佢哋獨有嘅結構令佢哋撳落嘅段落感同金屬敲擊感都有如撳原子筆咁爽，雖然喺現成嘅鍵盤見唔到佢哋嘅身影，但係而家Hotswap (熱插拔)鍵盤盛行，如Keychron、Glorious、Logitech等都有推出呢類可以換軸嘅型號，只需要5-10分鐘就可以輕易換晒成隻鍵盤嘅軸，鍾意Clicky軸嘅朋友就不妨考慮吓啦。(下圖為凱華Box Jade)
唔想煩，想揀吓現成型號嘅用家就可以睇下呢啲選擇：
Filco Majestouch 2系列(8.5/10)、Ducky One 2系列(7.5/10)、Razer Balckwidow系列(5.5/10)
而考慮DIY或者熱插拔鍵盤嘅朋友就可以留意吓：
凱華Box White、Box Jade、Box Navy、Box Pink、Ttc 金蘭軸(觸底靜音)等等
圖中左至右為 凱華 Box Pink、Box Jade、Box Navy、Box Royal(段落軸)
跟住就講吓好多文書用家鍾意嘅段落軸。
段落軸最出名有兩款，其一係絕大部份機械軸用家都聽過嘅茶軸(泛指Cherry MX茶軸 或其他Clones)，另一款就係好多DIY鍵盤用家都好推崇嘅Holy Panda(包括其他Panda變種或Clones)。
段落軸體係靠軸心(Stem)同彈片接觸嘅小腳(Legs)嘅形狀嚟決定手感。按壓嗰陣彈片會滑過小腳，去到啲起伏位嗰陣就會造成段落式嘅觸感反饋。小腳上嘅形狀起伏越大，按壓嗰陣嘅反饋(段落感)就越明確強烈。
現時段落軸主要分為「提前大段落」同「居中小段落」兩種。上文提及嘅Holy Panda軸就係「提前大段落」嘅俵俵者，明確嘅大段落以及加長軸心造成極清脆嘅觸底撞擊聲，俘獲咗好多對鍵盤體驗吹毛求疵嘅DIY鍵盤用家歡心，正版嘅Holy Panda軸售價可以高達每粒HK$8 - 1X 不等，買齊軸體已經貴過唔少現成鍵盤，對普通用家嚟講實在係有啲奢侈。(下圖為正版Drop Holy Panda)
而Cherry茶軸就係「居中小段落」嘅最佳代言人，或者應該叫做「微段落」先啱，撳得快少少已經唔係好察覺到佢嘅反饋，被好多用家嘲笑「唔順暢嘅Cherry紅軸」、「狗也不…」，避之不及。當然都有好多用家會鍾意「居中小段落」輕巧嘅觸感，但Cherry軸近年嘅質素實在令人大跌眼鏡，撇除大小段落之分，其他因素都係不如人意者甚。TTC為HyperX代工嘅Aqua軸同為「居中小段落」，但就受唔少DIY用家讚譽有加，極星SP-Star自家嘅流星橘軸筆者認為可以話係Cherry茶軸嘅完美改進版，更加可以一戰。
如上述所講，Cherry嘅MX軸專利到2014年先結束，喺結束之前佢已經有佔據咗好大嘅市場份額，有好多比較保守(難聽啲叫守舊)嘅廠，例如Filco、Ducky或者Corsair同ASUS等都仲好堅持使用Cherry軸體，而Razer、Steelseries等即使無再採用Cherry軸體，但選擇嘅替代品都依然走唔出Cherry嘅影響。佢哋嘅段落軸體或多或少都會同Cherry茶軸類似，採用咗居中小段落嘅設計。造成咗市面上基本上搵唔到一款現成鍵盤係有「提前大段落」嘅軸體，直至近期極星SP-Star推出嘅MK101 流星紫軸，先算真正有一款手感爽快程度不輸Clicky軸嘅大段落軸鍵盤問世。
如果要具體啲去形容 Cherry茶軸 同 提前大段落軸(Holy Panda、極星紫等)嘅分別，就應該係……
唔想煩，想揀吓現成型號嘅用家就可以睇下呢啲選擇
市面唯一大段落：極星MK101 流星紫軸(9/10)
居中小段落：極星MK101 流星橘軸(8/10)、Filco Majestouch 2系列(7.5/10 鍵盤滿分 Cherry軸負分)、Ducky One 2系列(7/10)、HyperX Alloy Origins系列(6/10)
而考慮DIY或者熱插拔鍵盤嘅朋友就可以留意吓：
Drop Holy Panda、Glorious Panda、ZealPC Zealios、SP-Star 極星紫軸、Outemu Boba……等等等等不能盡錄。
圖為Glorious Panda
而Linear線性軸就係筆者個人最鍾意，亦都係最接近玄學嘅軸類。因應線性軸中途無任何嘅「潤色」，所以任何對手感有負面影響嘅因素都會被無限放大，包括但不限於軸體運行嘅唔順暢、彈弓嘅回彈力度/風格、觸底嘅觸感同聲響、軸體部件之間嘅晃動(模具唔精準)等等等等，可謂將鍵盤發燒友吹毛求疵嘅態度發揮得淋漓盡致嘅舞台。
線性軸體無多餘嘅部件去潤色手感，小腳嘅坡度完全係平伏嘅。
而一如上文兩種類型，線性軸體之中最出名嘅都係Cherry MX嘅紅軸同黑軸，基本上任何一個機械鍵盤用家都講得出紅軸黑軸，亦都同青軸一樣成為咗該類別軸體嘅代名詞。好多顧客一行入門口就會講「想搵紅軸」或者「想要青軸」。但其實Cherry 紅軸同茶軸一樣，都係同一類別入面被有要求嘅鍵盤用家唾棄嘅軸體。
Cherry其實由3、40年前已經製造緊MX軸體，而以前嘅Cherry線性軸可謂獨步天下，兼有「順滑」、「穩定」同埋「靚聲」(Thocky)。但係由於機械鍵盤興起，舊有模具唔足以應付產能，新嘅模具反而無舊時咁精準，公差導致新出產嘅Cherry軸無舊軸咁順暢，造成新不如舊嘅尷尬境況，喺紅、黑等線性軸體方面尤其明顯。直至而家都有好多用家會去搵啲幾十年前生產嘅拆機黑軸用，有價有市，有保證嘅來源叫價可以去到接近10蚊1粒(正常Cherry軸新品係約HK$2.5)。
線性軸原理簡單，喺結構設計上唔需要過多嘅心思，但對製造軸體嘅模具同埋潤滑等加工就十分依賴。因為線性軸首要嘅條件就係要順暢，Cherry軸被唾棄嘅主因都係因為公差導致磨擦感太重(Scratchy)。而順暢最重要就係軸體本身嘅模具無公差，部件之間完美貼合唔會晃動，而鍵程保持到順暢一致嘅手感先算合格。
其次就係潤滑，軸體部件係塑膠製作，所以喺製作過程中需要喺導軌等部件與部件接觸嘅位置搽潤滑油，減低部件之間嘅摩擦力，令粒軸使用嗰陣唔會有明顯嘅磨擦感。一啲要求高嘅DIY用家會嫌工廠量產嘅時候潤滑嘅手工做得唔一致，而自己逐粒拆開嚟重新潤滑，係一項繁複而枯燥嘅工程。再落就係彈弓、彈片等嘅質素同埋潤滑等等。
可能會有讀者睇到呢度會問，咁Cherry咁唔掂，而家市面上有咩線性軸體好推薦？
2014年後軸體廠商同產品就好似雨後春筍咁標出嚟，好過Cherry嘅線性軸真係手指都唔夠數，要用手毛先數得晒。先唔計DIY市場以百計嘅軸體，現成嘅鍵盤入面其實唔少選擇都好過Cherry軸，因為線性軸體要做好係難，但單純追求順滑其實好多廠都做得到。例如SP-Star極星採用嘅流(極)星灰/白軸、Keychron採用嘅Gateron紅軸、Ttc幫HyperX代工嘅火(紅)軸等等。或者計埋線性機械軸嘅演變出嚟嘅光軸同其他變種更加數不勝數。如果對線性軸手感有要求嘅用家筆者強烈建議你試吓撇開Cherry軸，天空會更闊架！(下圖為 極星MK101 流星白軸，攝:Bokkey Hinson)
唔想煩，想揀吓現成型號嘅用家就可以睇下呢啲選擇：
極星MK101 流星灰/白軸(9/10)、Varmilo 靜電容機械軸款(8.5/10)、Razer Huntsman TKL 光軸(6/10)、Roccat Vulcan Pro 光軸(5.5/10)、Keychron系列(紅軸6/10 光軸5.5/10)
而考慮DIY或者熱插拔鍵盤嘅朋友就可以留意吓：
JWK re-color clones(C3Equalz Tangerine、Thic Thock Mashmallow等)、TTC 金粉/金紅、ZealPC 線性系列、Gateron Ink系列、Cherry HyperGlide 黑軸(其他到手可用 HG黑必須重新潤滑)……等等等等不能盡錄。
圖為Thic Thock Marshmallow軸 設計師係香港人
鍵盤市場可以話被Cherry「荼毒」太深，即使以成本論，同價位都有太多勝於Cherry嘅軸體可選。奈何Cherry軸已經喺專利期內奠定難以動搖嘅基礎，以致鍵盤廠商喺中高階型號根本唔敢賭一鋪改用其他軸體，而低階型號受限成本只可以採用啲入門嘅軸體﹐品質較參差，相形之下難以體現Cherry軸嘅劣勢。所幸有AKKO等開始採用TTC金粉等較高階軸體嘅量產鍵盤出現，又有極星呢間以機械軸體起家嘅公司推出量產鍵盤，以優秀嘅軸體同埋頂級嘅造工同調較加入現成鍵盤嘅頂端。否則都唔知幾時先會見到「提前大段落」軸體出現喺量產市場，時至今日筆者都未見到有第二間廠商推出呢類軸體嘅鍵盤。
(圖為Novelkeys NK65 Milkshake Edition 熱插拔鍵盤，配搭隨機顏色Novelkeys Silk線性軸)
以往用家如果想用DIY市場嘅軸體，一係只可以完全買料自組鍵盤，或者將現成鍵盤拆散焊甩本身嘅軸體再焊上新軸，需要一定基本知識同技能，門檻較高。而熱插拔鍵盤嘅興起就將呢個門檻降到貼地，只要有手有腳，同埋一支拔軸器就可以將成隻鍵盤嘅每一粒軸體根據自己嘅喜好去更換。而且有要求又有心思嘅用家仲可以拆開每粒軸體去上油潤滑，或者更換更啱心水嘅彈弓去做到盡善盡美。可以喺現成鍵盤有限嘅可能性之中將佢盡量改進到你嘅預期。(下圖為熱插拔鍵盤 掹軸示範)
雖然筆者承認Filco、Ducky等品牌長久以來對鍵盤質素嘅堅持，但喺呢個軸體百花爭妍嘅年代，仍然抱殘守缺堅持用Cherry軸實在係唔明智，亦都唔符合市場嘅需要。而與Filco同為現成鍵盤天花板嘅Leopold喺2020年開始都已經開始同SP-Star極星合作，部份型號提供極星紫同極星灰軸嘅選項(不過香港貌似無引入)。雖然樂見極星等新晉嘅高質鍵盤生產商加入戰團，但始終都希望由細聽到大用到大嘅Ducky、Filco等老字號都會開始進步而唔係墨守成規，令到現成鍵盤有更多更好嘅選擇。